Skip to main content
Boy Yendra Tamin

follow us

Pidato Adat : Tentang Asal Usul Iskandar Dzulkarnain

Oleh : H. Emral Djamal Dt. Rajo Mudo

Nabi Adam awal partamo, Nabi Nuh Rasul kaduo, mangko terjadilah tanah kuniang, terhantar ke tiang Arasy teredar atas Kursyi. Kursyi bertabur intan dan podi, parmato nilam baiduri, lagi beralas kain suto Indo-bana, dalam sarugo tujuah pangkat. Kursyi kadudukan Daulat Yang Dipertuan, iyolah Sultan Iskandar Dzulkarnain, anak Adam nan kurang aso ampek puluah.

Mangko bertiuplah angin si dolak dolai, babunilah gandang jo sarunai nan banamo si Rajo Nobat, sarato rabab jo kucapi. Dipalulah sagalo buni-bunian dalam sarugo, takambanglah payuang ubur-ubur, manari lah anak bidodari dalam sarugo.

Mangko terhamburlah bau-bauan hambar dan kasturi, sukolah hati sagalo anak bidodari. Mangko turunlah malaikat nan baribu-ribu, pai kapado anak Adam di ateh awang kalamuang. Mangko mamandanglah anak Adam ka ateh langik, tadangalah suaro di ateh bukik Qaf, talieklah putieh sarupo buieh di lautan.

Lawikpun berombaklah anginpun bertiup, turunlah malaikat dari langik nan katujuah, akan mengunjungi Sultan Iskandar Dzulkarnain, sambahan alam dunia nangko. Mangko berkawinlah Sultan Iskandar Dzulkarnain, dengan anak bidodari dalam sarugo, baroleh anak tigo urang.

Surang banamo Sultan Maharjo Alif, nan jatuah ka banua Ruhum, surang banamo Maharajo Depang, nan turun ka banua Cino, surang banamo Si Maharajo Dirajo, nan turun ka pulau ameh nangko.


Lorong kapado rajo nan batigo, itulah Rajo Tigo Jurai, sati nan bukan alang-alang. Jikok talinteh inyo manoleh, jikok tarancah inyo malompek, jikok disabuik lidah kalu, jikok ditantang mato buto, jikok dikana hati lintuah. Anak rajo sunduik basunduik anak puti turun tamurun. Anak Sultan Iskandar Dzulkarnain Nan Batanduak Ameh kandirinyo, nan banamo si Jato-Jati, cucuran Adam Siti Hawa.

Mangko berlayarlah Sultan Sri Maharajo Dirajo, di tangah lawik Jibrallah, sarato Cati Bilang Pandai, datang nan dari Tanah Basa. Tampaklah api takijok-kijok, api dituju cahayo hilang, galok gulito maso itu, takaranglah kami maso itu dipuncak Gunuang Marapi, tasumbua dalam lautan gadang nan sabagai talua ayam.

Sirawik bari hulunyo

diasah baru bamato

Lawik sajo dahulunyo

barulah timbua pulau paco

Dimano asa titik palito

dibaliek talang nan baduri

dimano asa niniek kito

iyo,

di puncak Gunuang Marapi

Sinanlah Sirangkak Nan Badangkang, sinanlah Buayo Putieh Daguak, di bawah batu hamparan putieh, di bukik patah patigo, iyolah gunuang patah sambilan. Sinanlah Lagundi Nan Baselo, di sinan Bintuak Nan Barayun, di sinan Sirangkak Hitam Kuku.

Mangko dipabueklah Balai Balairung Panjang, dipapek cupak dibuek adat. Cupak Nan Duo Gantang Nan Ampek.

Adat rantau dibari barajo, Luak dibari bapangulu, Kampuang di bari ba Nan Tuo. Didirikan Lareh Nan Duo, Luak Nan Tigo. Iyolah Lareh Koto Piliang bagala Lareh Nan Bunta, pegangan Datuak Katumang guangan. Lareh Bodi Caniago bagala Lareh Nan Panjang, pegangan Datuak Parpatih Nan Sabatang. Mano nan Luak Nan Tigo, partamo Luak Tanah Data, kaduo luak Agam, katigo jo Luak Limo Puluah.

Mangko duduaklah Rajo Nan Baduo, di ateh kurisi Sambur Loyang. Di kiri rumpuik bapalangi, di kanan Johar Mahanikam.

"Bungka Nan Piawai"

Tuanku Mudo

H. Emral Djamal Dt. Rajo Mudo

Spesial Untuk Anda:

Comment Policy: Silahkan tuliskan komentar Anda yang sesuai dengan topik postingan halaman ini. Komentar yang berisi tautan tidak akan ditampilkan sebelum disetujui.
Buka Komentar