Skip to main content
Boy Yendra Tamin

follow us

“ Parewa Sato Sakaki “ Rusli Marzuki Saria

Catatan Dasril Ahmad

Esei-esei berbahasa Minang sebagai tulisan kolom "Parewa Sato Sakaki" karya penyair Rusli Marzuki Saria di Harian Haluan, Padang, setiap hari Minggu dari Oktober 2001 sampai Juni 2007, kini dalam persiapan untuk diterbitkan dalam bentuk buku. Berikut kita nikmati 2 esei dari 228 esei terkumpul, yaitu berjudul "Bari Aden Tambo" dan "Sanjato Melawan Puisi". ***

“Bari Aden Tambo!”

Oleh : H. Rusli Marzuki Saria

“Garimih.”

“Bulan September.”

“Badai.”

“Di pantai!”

Akhia Agustus. Udara malam taraso sajuak. Langik tidak barawan. Ado karinduan ke maso lampau. Namonyo “nostalgia”. Padati indak dapek bajalan basisuruik. Jaman suzuki, komah! Padati kabau buatan Japang. Manga awak? Manangihi baro. Manangihi abu!

“Aden takuik!”

“Manga?!”

“Manulih tantang diri sendiri.”

“Labiah-labiah untuak...!”

“Pasiapan?”

“Tujuah puluah tahun.”

“Kanai mode pulo, komah !”

“Supayo jan ketinggalan kureta?”

“Iyo, iyo ..iyo ...!”

“Manulih memoa urang. Manulih memoa pulo awak!”

“Memoa banyak panduto?”

“Kecek urang, iyo!”

“Biasonyo, indak jujua! Nan rancak-rancak sae nan we’e tulih!”

“Inyo panakuik, dalam memoa, inyo tulih bagak!”

“Inyo suko tiarap. Dalam memoa, inyo tulih tagak!”

Salamik tingga Agustus. Bulan maradeka. Bulan babaih dari penjajah. Bulan managih dek nan tuo-tuo. Taun ampeklimo, inyo lasykar. Kudian, jadi tantara. Dapek pangkek, kolonel, sudah itu, pansiun. Kudian laia pulo anak-anaknyo. Sumangeknyo, indak sarupo sumangek bapaknyo. Masalah generasi, iyo masalah generasi masing-masing. Lai bawarihkan sumangek apak tu? Lai, tapi indak ado jajaknyo. Sarupo jajak sipasan sajo. Warih mawarihkan, itu iyo slogan ampek limo.

“Tulih!”

“Aaa, nan ka tulih?”

“Memoa!”

“Tulih, see-lah!”

“Aden tukang baco.”

“Manulih jo mambaco, apo bedanyo?”

“Nan ciek banyak dutonyo. Nan ciek banyak ruok-nyo.”

“Ruok apo?”

“Ruok ikan sapek di pamatang tabek.”

Agustus balalu. Bulan September suko badarah. Nasib juo sadang badarah-darah. Banyak kurenah, manusia iyo banyak kurenah. Kadang-kadang lambuik, tapi juo kareh. Inyo takiah aia di batu. Inyo pilin sunguiknyo, inyo pacu kudonyo. Bukik Tambun Tulang. Tampak panyamun.

“Maa, Tiang Bungkuak?”

“Bundo Kanduang?’

“Mangirap! Mangirap! Mangirap ka langik!”

“Pagaruyuang!”

Bulan bajalan sarupo samuik di langik. Partampuran malam dari tambo, bari aden Tambo. Bari aden Tambo!

“Pintu rumahnyo balonceng. Kalau inyo bakuaso. Ado satpam di pintu gerbang rumahnyo.”

“Salero agraris nan lain?”

“Ado!”

“Di ruangan rumahnyo nan laweh, lapiak parmadani inyo sangkuikkan di dinding.”

“Ba-a mangko indak lukisan. Lukisan Wakidi atau lukisan Israr, umpamo-inyo?”

“Ka-a dinyo lukisan. Di sampiang indak mangarati jo lukisan. Saleronyo randah pulo. Labiah-labiah inyo baru pulang dari Makkah. Inyo banyak mambao lapiak parmadani.”

Ondeh! Tuan-den nan ampia marantau limopuluah taun, kini alah kayo.Arato alah sambuah. Iduiknyo alah bakacukupan. Di kota, rumahnyo indak ciek lai doh! Alah sapuluah. Kok bininyo iyo ciek nan tacatat. Kok ado “simpanan”nyo? Antahlah...! ***

(Haluan, Minggu, 28 Oktober 2001)

Dari kanan kekiri: Rusli Marzuki Saria, Dasril Ahmad, Prof  Ismet Fanany, Dr.Reberca Fanany

Sanjato Melawan Puisi

Oleh : H. Rusli Marzuki Saria

“BAA kaba?!”

“Sarupo ko nyo.”

“Lai sanang-sanang sajo?”

“Kok banyak bana tanyo.”

“Taragak bana ambo!”

“Ampek puluah taun indak basuo.”

“Alah banyak cucu den. Salapan banyak-e.”

Ajo Kutar, sadang maota kareh jo Ajo Sidi. Nan surang bugih lamo. Nan surang tanun Kubang. Nan ciek suto, nan ciek lai, banang duoribu. Saruang bugih sajuak. Saruang Kubang maisok paluah.

“Baa kambia kini, jo?”

“Alah jarang buah-e. Banyak abih dek tupai!”

“Gardam inggu, lai laweh parak-e?’

“Alah lamo tandeh. Den, baka sado-e!”

Kato-e, ari Jamaik, ajo sidi ka pai ka Medan maliek anak-e. Sabok urang ka masuak puaso.

Ajo Kutar tasunguik. Anak-e alah lamo indak maagiah kaba. Antah baa we-e kini di rantau. Agak se-lah, wee-e kan manggaleh di kaki limo.

“Garimih manangih”

“Ati den taibo.”

“Rusuah!”

“Indak!”

“Apo nan ka dirusuahkan.”

Matoari mandok di awan cabiak-cabiak bulu ayam. Angin tajam, sarupo taji. Ari bakisa ka patang ari. Paneh patang angeknyo alah urabi. Tabayang kamasuak puaso. Ari baiak jo bulan baiak sadang mananti. Tabayang sanok jo apam sarabi. Cindua sago basantan manih.

“Naiak!”

“Apo nan naiak?”

“Arago barang.”

“Ka masuak puaso, biaso.”

Iyo baitu, rang mudo. Ajo Sidi manjungua ka lua jandela lapau. Lalu mancaliak ka TV. Amerika sadang mamborbardir Afghanistan malam ari. Dalam sajarah, Afghanistan tu indak panah tajajah. Takana Iskandar Aguang, takapuang di lambah Pansyawar. Afghanistan, nagari nan alah malaiakan penyair-penyair gadang. Ingek Rumi, ingek Attar dan Al-Afghani.

“Rusuah, den!”

“Nagari gadang, suko malendo.”

“Inyo nagari kayo.”

“Sado-e ka nyo bali.”

“Sia lawan-e?”

“Osama bin Laden.”

“Siapo tu?”

“Urang Arab nan kayo.”

“Osama bin Laden simbol palawan taradok Amerika nan ongeh!”

“Kecek, sia?”

“Tulih buku-buku. Ajo Sidi membayangkan wajah nabi, sarupo nan ditulih dek Mohammad Haykal dalam bukunya “Muhammad”.

Parewa sadang mambaco puisi nan sadang dilawan dek roket-roket Amerika di Afghanistan... ***

(Haluan, Minggu, 25 Nopember 2001)

Spesial Untuk Anda:

Comment Policy: Silahkan tuliskan komentar Anda yang sesuai dengan topik postingan halaman ini. Komentar yang berisi tautan tidak akan ditampilkan sebelum disetujui.
Buka Komentar